Pas inkuadrimit në Superligën e Kosovës në futboll, Prishtina e Re ka filluar ta konsolidojë skuadrën për një sezon sa më të mirë në elitë.

Kryeqytetasit kanë zyrtarizuar marrëveshjen e bashkëpunimit me kapitenin e skuadrës Samir Sadriu, shkruan Arbresh.info.

Lajmi është bërë i ditur përmes një postimi në rrjetin social Facebook të klubit.

“KF Prishtina e Re konfirmon vazhdimin e bashkëpunimit me Samir Sadriun, kapitenin e skuadrës, i cili mbetet pjesë e pandashme e klubit edhe në periudhën kur po vijon procesin e rikuperimit nga një lëndim serioz i pësuar në muajin shkurt”.

“Ndërsa vazhdon rikthimin drejt formës së plotë, Samiri do të jetë pranë skuadrës në një rol të përkohshëm si menaxher i ekipit, për të ruajtur afërsinë me grupin dhe për të sjellë frymën e tij udhëheqëse edhe jashtë fushës së blertë”.

“Kontributi i tij për KF Prishtina e Re ka qenë gjithmonë i çmueshëm, si në fushë ashtu edhe në dhomat e zhveshjes dhe ne jemi të bindur që prania e tij mbetet një vlerë e madhe për gjithë grupin”, shkruhet ndër të tjera në njoftimin e klubit./Arbresh.info